對於今日單小三Liddy係槍手女兒嘅新聞，彭順微博有關注嘅18位0靚模之一邱美薇，今日接受電話訪問時話：「我同Liddy係舊同事，之前我做幕後，佢係公司旗下model。4年前嘅事，當時佢啱啱做完『SING之天使』，聽佢講過冇同爸爸住，因為同媽咪離婚。佢係個勤力女仔，好乖，佢好鍾意唱歌，希望做歌手，當時成日搵老師學唱歌，仲問我有冇老師介紹。份人亦好守時，冇乜脾氣。我o依家唔敢慰問佢，畀佢靜吓。」

問是否Liddy介紹佢識彭順？邱美薇話：「係其他朋友介紹識彭順，真係唔知佢哋拍拖。」

同係o靚模嘅羅彩玲（Vivian），過往亦曾被指介入周秀娜同當時男友陳偉成（Avis）之間感情，背負小三之名。

今日Vivian喺銅鑼灣出席活動，講到Liddy件事都感到好震驚，Vivian話完全唔認識對方，希望Liddy唔好太傷心。而被標籤為小三，Vivian話壓力會好大：「件事比我嗰陣嚴重，佢真係畀人影到，佢屋企人同親朋戚友壓力更大，唔係個個受得到。」

Vivian以過來人身份建議減壓方法，Vivian話：「我嗰段時間成日失眠，要朋友開解。同埋好重要，最緊要係時間。」

另外，組合天堂鳥今日出席活動時，亦說：「有留意報道，估唔到好戲劇性，朋友起初send報紙相俾我哋睇，以為係改圖。」有網民猜測李悅彤被揭發小三係成件事導火線，天堂鳥話:「網民咁估都正常，殺人者有傷人前科，有呢啲動機唔出奇。」


【A1內幕】槍手女兒是彭順小三事件始末
http://bit.ly/hkshotdead