張智霖(ChiLam)上次演唱會,囝囝魔童突然現身舞台,搞到大家都好驚喜,但噚晚個唱,ChiLam就搵魔童同佢聲演講鬼故。
個唱尾聲時,ChiLam唱《今生今世》時,送畀坐喺VIP席上嘅老婆袁詠儀(阿靚),阿靚甜絲絲向ChiLam送上飛吻,ChiLam話:「佢好熱情,好HOT...會唔會好肉麻﹖」ChiLam亦唱出韓劇《來自星星的你》主題曲《MyDestiny》。
完騷訪問,講到佢唱韓文歌,ChiLam話:「我有下過苦功,同埋發現自己記憶力仲幾好。」
對於魔童聲演,ChiLam話:「搞咗好耐,因為要諗講咩文(語言),有時又錄得唔清,我都唔記得鳴謝佢,其實佢今晚有嚟,只係同其他auntie一齊坐,可以蒙混過去,唔想佢成為焦點而影響到其他人。」
ChiLam感謝好友幫忙時,一度眼泛淚光,事後佢話:「自己表現比以前成熟啲,起碼忍到喊,我同自己講過,唔應該用呢個情緒去面對咁開心嘅事,好感動,好容易觸動到自己,同埋又咁辛苦操練,諗起好多辛苦環節,可能平時嘆慣,少少嘢就頂唔住,但都係好好磨練自己時間。」。