馬場上一向陽盛陰衰，不過澳門馬會明晚會歷史性舉辦國際慈善邀請賽事日暨女騎師慈善賽，一眾業餘女騎師將一展身手。
都係多得賭王四太梁安琪，佢自從接任澳門馬會代主席之後，貫徹凡事去盡嘅作風，要將澳門馬會提升到國際級地位，今次搞搞新意思辦女騎師慈善賽，連香港馬會都未試過。
全體參賽英雌噚日拉隊去上環信德中心馬會會所，見傳媒兼造勢。一班業餘女騎師個個都係金髮美女，着晒顏色鮮艷嘅騎師綵衣。不過，呢班業餘女騎師就算再省鏡，都唔夠主人家四太搶鏡。佢噚日雖然姍姍來遲，但一到場，攝記嘅閃燈閃到華華眼都花晒，風頭完全蓋過一眾女騎師。
四太賣花讚花香話，「個個女將都騎得又睇得，肯定好睇過香港小姐選舉。」淨係講新意，四太都贏三色台幾條街啦！