當年今日
關於我們

Goal富帥:齊心爭升班屈仔「高」幾班

蘋果日報 2020/11/06 00:00


英冠已進行10輪聯賽,前列球隊好似雷丁、諾域治等,都係熟口熟面嘅前英超兵。始終疫情關係,中下級聯賽球隊,更加難花費巨額擴軍,好似屈福特咁,保留上季大部份英超兵,已經夠喺英冠用,暫列第四位,周六屈福特主場對高雲地利,讓半/一可以做重心。
英冠賽程比英超更密,周中屈仔靠伊斯美拿沙亞補時階段入波,3:2險勝史篤城,終止三場不勝走勢。講真屈仔人腳,好似迪尼同安達格雷等,夠晒級數踢英超中型班,不過仲留喺度,擺明齊上齊落爭升班。周六繼續主場更加放心晒,事關屈仔英冠5場主場拎到4勝1和。始終英冠開盤較英超保守,今場屈仔贏面咁高,海外博彩公司都係開出主W1.68倍,亞洲盤讓半/一,簡簡單單撐屈仔贏波開上盤就搞掂。
對手高雲地利都叫做上過頂級聯賽,不過都已經係好遠古嘅事,呢幾年仲喺英冠、英甲浮沉,甚至降過去英乙㖭。以佢哋家陣嘅人腳,都係但求留喺英冠。高軍今季贏過兩場咁大把,仲要5場作客只拎到1分,今次作客真係冇眼睇。
除咗重心屈仔,打比郡都可以繼續追,不過係追佢哋對家,打比郡已經連續六場冇贏過,周中主場輸埋畀昆士柏流浪。就算周六繼續主場對班士利,以班士利可以擊敗屈仔嚟睇,佢哋實力唔差,平手盤點都係揀隊識贏嘅班士利。
Goal進
截稿前馬會尚未開盤,盤口僅供參考,讀者記得留意足智彩網頁。
empty
empty