美韋達雖然喺2015年宣佈退役，不過呢位現年40歲嘅美國「不敗拳王」依然都係咁大洗，佢喺周一就送咗架價值31,000鎊（約300,000港元）嘅Benz黑色跑車畀細囝Zion，慶祝佢16歲生日。

美韋達為咗氹囝囝開心，仲為佢舉辦一個生日P，而Zion呢個富二代都學足老竇咁拎住一大疊銀錢派街坊。不過，大家都唔好以為美韋達偏心呀，因為佢上年買咗架30,000鎊嘅Benz畀大囝Koraun做生日禮物㗎。