主持盛女節目嘅美容達人陳莉敏（Queenie）今日以一身「敏哥」打扮現身書展，佢話今日係應fans現求轉吓形象，仲話唇上嗰撇鬚，係由日本空運到港。提到佢本新書，Queenie話之前嗰兩本都係講美容同整容多，呢本轉去講心靈上嘅嘢：「譬如我啦，對於愛情同作為中女嘅愛情態度係點樣呢？美容都會講啲，大約3分之1。又收集咗過去一年嘅金句，（最精景嗰句係乜？）『當冇男人捧你做公主，你就要捧自己做皇后。』有男人錫係幸福，但愛情係冇常，識得點樣愛惜自己、經營好自己。」佢仲話o依家同20年前嘅愛情觀已經爭好遠。

書中提到「不必做大眾女神」，Queenie話：「好多人將女神嘅定義係話係咪要有外表靚，或者係點樣，但對我嚟講，我媽都係我嘅女神，每個人都可能係某個人心目中嘅女神，只不過唔需要執着地做一般大眾嘅女神，總知人係會老，我覺得女人嘅魅力係去到80歲都令人尊敬同欣賞你。」

講到美魔女，有消息指大台搵咗Queenie同羅霖去做真人騷，去頂ViuTV個真人騷，Queenie承認自己有份做：「未搵到真係好美魔女嘅素人，一般人大眾心目中嘅美魔女可能係40幾、50歲，或者傳統日本美魔女30幾歲，睇落似10幾20歲好卡娃依嘅，我都有同監製傾過，係咪要顛覆呢個美魔女嘅傳統definition？當然外表都唔可以太差，但係係咪就係齋外表呢？講真就算係我，啲人讚我保養得好，我都唔覺得我係美魔女，因為其實我哋o依家都recruit咗幾好嘅candidate，有啲真係50幾60歲，睇落似30幾歲40歲，同埋我唔想搵一班美魔女係一班阿太，有錢日日去做spa食花膠，做嚟冇意思，啲人會覺得有錢我都做到美魔女啦！唔想，所以要廷遲播就係為咗去搵啲真係好正嘅。今次會搵香港同台灣，以香港為主，節目形式都唔係想宣揚醫學美容，而係想探討佢哋以前嘅心路歷程，點睇自己呢？o依家搵咗一大半，要做最後甄選，最後5至6個。」Queenie仲話冇咁快拍住，而羅霖會客串。