「咁持續落去，支持多3、4個月已經係極限。」肺炎過去兩個月肆虐本港，一眾商戶叫苦連天，「616火鍋」老闆Ken的這句肺腑之言，相信亦是一眾本地商戶的心聲寫照。除了零售及食肆首當其衝，就連網購平台都遭遇供貨危機，變相令生意陷入停頓邊緣，有商戶早已作出壯士斷臂的預備，但亦有老闆不服輸，靠直播突圍而出，成為逆市奇葩，更在兩小時直播中達成90萬銷售額。

因為「打邊爐家族」感染個案，過往港人熱愛的火鍋店，現人人敬而遠之。近年因潮汕牛肉火鍋熱潮，已開12間分店的616火鍋，當中有4間分店更是近兩個月新開，面對武漢肺炎疫情，老闆Ken猶如萬箭穿心，「農曆新年過後，生意同高峯期比，跌到唔夠一成，之前社會事件，都係旺區嗰兩三間舖頭有影響，民生區冇事，但今次疫情令到全線無差別咁大跌，新開嘅4間分店已暫時休業。」現場所見，晚市的黃金時段，尖沙嘴分店只得3枱客人，每晚營業額連5位數也不足。他形容捱多3至4個月已是極限。

面對火鍋傳染病毒風險，Ken想出以外賣自取8折方式挽救銷情，推出首周，生意額佔整體達五成，但熱潮過後無以為繼，同時業主對減租等共渡時艱的方案不置可否：「其實減租減幾個百分點，同冇減過冇分別，已作最壞打算，資金有問題我哋創辦團隊唔會出糧。」面對病毒這種不可抗力的因素，Ken坦言可改變的方法不多，會將外賣自取「升呢」做跨區送外賣服務，務求「保住一直以來嘅長工。」政府曾推出救市方案，惟Ken認為遠水不能救近火，「呢個疫症最困難嘅時間，其實就係呢一兩個月，呢段時間派唔到錢，相信很多舖頭執咗笠，再之後派其實已經冇意思。」

鞋佬變陣生活百貨 2小時賣90萬貨

零售餐飲等實體店固然受衝擊，但網購平台亦難倖免，靠網上直播銷售女裝鞋及手袋的「女鞋國」，疫症爆發前，每月銷售額高達400萬元，但自從中國實施封城措施後，無貨供港，創辦人「鞋佬」表示：「鞋嗰邊嘅業務停晒，完全冇貨賣，因為我自己在廣州開工廠製鞋，封城工廠停工，過年後一直未復工，我想做生意都冇貨，惟有變陣。」他繼續以網紅方式開直播，但由賣鞋變為出售生活用品，每周生意額均上升20%至30%，增幅驚人：「用兩個鐘直播介紹產品，再喺兩個鐘內限時購買，過時後將貨品下架，呢個方式開始咗一個月，生意額每星期都升緊，最近兩小時內做咗90萬生意。」

鞋佬認為轉型生活百貨的增長並非曇花一現，而是可持續的增長，「大家怕咗出街，學習網購，以前賣鞋，新增客戶冇咁多，但生活百貨新增客戶係多咗好多，而家將每星期賣鞋嘅直播時間改為賣生活用品，女鞋國fb有6.6萬個followers，做到400萬生意；生活百貨1.2萬followers，一星期做90萬生意，而且直播頭15分鐘幾乎已賣晒啲貨，如果我貨源充足，其實要兩小時做到150萬生意係得嘅！」經過今次肺炎疫情，鞋佬認為要為公司做足兩三手準備，「工廠停咗對公司好大影響，直播都係，所以每一樣嘢都要做足準備，例如唔好所有貨都自己生產，分散風險。」他笑言目前以網紅帶貨方式開店遇着最佳時機，「如果3年前咁做，應該收咗檔。」

黃店告急 獲網民支持

肺炎所影響的環節，一環扣一環，骨牌式推冧市場，中小企要顧及一班員工飯碗，有龐大固定支出，但就算一人的蚊型公司，要生存也非易事，製作銀器的「火樹銀花」老闆小白，以往主力做批發生意，向其他商戶供應銀器，「但自從去年開始，佢哋一直Cut單，守到過年前已經唔掂，蝕到見底，跟住就爆發肺炎。」他坦言，上月情況差至要自掏腰包來為工場交租，「曾經有諗過結業。」由於小白的商店去年曾參與罷市，被網民標籤為「黃店」，他在網上發帖求救後，「黃色經濟圈」威力顯現，立刻有客人報名參加他的DIY製作班，但生意仍未復當年高峯期，「而家要轉型做埋零售，其實做咗40幾年香港人，最近一年發生嘅事係我未見過，但都發現到，原來香港人係咁守望相助。」

記者：陳新政

採訪/ 陳新政
編撰/ 陳新政
攝影/ 細釗、Gary
剪接、後期/ 張嘉富
編審/ 楊智佳

----------------------------
【武漢肺炎】專頁
全民自救 抗疫資訊盡在《蘋果》
-----------------------
屬於香港人的移民攻略
立即登入【全球樓行】
Dream House零距離