【名家搶先睇】美國泡沫未完結(晉佳)
聯儲局加息晉佳
港股中線調整浪已經出現,短線就要忍手唔買。不過,所謂唔買可能只係短線嘅事,因為稍後仍有可能要擁抱一場泡沫。
點解?或許講返美國加息,同埋聯儲局計劃年底開始收縮資產負債表。
自08年金融海嘯後,聯儲局資產負債表增加超過3倍,但同期睇返美國M2,只係增長六成左右,反映美國開動印鈔機後,資金並非完全流去市場。不過,情況開始有轉變,過去一年,美國M2增幅達到6%,但GDP增幅估計只有2%或更低,M2增幅繼續拋離GDP嘅話,肯定會形成泡沫。聯儲局為咗阻止資金泡沫出現,縮表係必然嘅事,問題係,今年開始縮表算唔算遲。
只要將聯儲局資產負債表增幅,拍埋同M2增幅比較,就知道聯儲局即使縮表,對於未來M2增長嚟講,睇唔出有乜大關係,早年聯儲局開印鈔機嘅效應,今時今日、甚至未來先係真正白熱化,因此先要同時加息,期望能起作用。同一時間,聯儲局亦不可能做推手,加快縮表而導致冧市,成為千古罪人,所以只能控制市場預期,縮表要慢慢做,永遠只會做得太少。正正因為縮表同時加息,作用仍有限,所以喺美股真正癲市前,嚟緊調整都仲可以視為買入機會。
掌握財經生活資訊,即Like「蘋果ATM」fb專頁啦!
http://fb.com/appledailyatm