歐洲足協（UEFA）公佈今季歐洲賽安排，歐聯賽事將會喺8月7日重開，率先上演嘅會係仲未踢完嘅4場16強次回合賽事，暫時未確定喺邊度踢。至於八強去到決賽，就全部會安排喺葡萄牙里斯本上演，而決賽會喺8月23日進行。UEFA喺公告中提到，八強以後嘅比賽會喺賓菲加同士砵亭嘅主場踢，如有需要，波圖同甘馬雷斯嘅主場會舉辦16強剩番嘅4場次回合賽事，而八強起所有賽事都改一場過。

原定獲得今年歐聯決賽主辦權嘅土耳其伊斯坦堡會下季先舉辦決賽。至於歐霸盃八強至決賽就會移師德國舉行，未踢嘅2場16強賽事（國際米蘭vs基達菲、西維爾vs羅馬）會改成一場過。