韓國人氣男團BTS(防彈少年團)將於嚟緊嘅周六同周日喺亞博館ARENA舉行演唱會，之前門票公開發售已火速售罄，而當中公開發售嘅票價就分為$1,680、$1,280、$880及$580四種，不過粉絲就發現價值$2,280嘅VIP門票就不作公開發售，據了解VIP門票只作內部認購，VIP門票嘅位置同$1,680嘅企位飛位置一樣，但多咗一個參觀綵排環節，等購買VIP門票嘅觀眾可以喺開售前睇BTS綵排，由於VIP門票數量唔多，加上只能內部認購，搞到唔少粉絲要購買黃牛飛。

而噚晚主辦單位Rolemodel Entertainment Group(香港CJ)就喺facebook公佈VIP門票參觀綵排環節安排(相關連結： http://bit.ly/2r0vMQm )，當中勁多粉絲就衝入去留言狂轟，更質疑主辦不公平購票，又留言：「其實你哋可唔可以解釋下邊到有得官方售賣$2280 VIP門票？係咪俾哂黃牛內部拎哂咁就叫公售啊嘛？香港區連想買嘅機會都冇，你公售都冇呢個票價你都仲好意思拎出嚟話有$2280V.I.P可以睇綵排。」、「好犀利呀，傳說中嘅2280，又叫我哋要用合法渠道買飛，快達票都無得揀，點買架大佬，你扣起哂啲飛炒黃牛，乜都你玩哂啦 你仲好意思po個段出嚟比人博鬧，我哋army係為見防彈啫，唔係比你哋利用我哋呢個心去搵多啲錢，比你哋搞個演唱會真係搞到香港army心已死。」

有粉絲仲留言：「香港海關人員負責執行香港法例第362章《商品說明條例》及當中的八條附屬法例，目的是禁止在營商過程中，對提供的貨品作出虛假商品說明、以及虛假、具誤導性或不完整的資料及錯誤陳述，以保障消費者。」

另外，唔少粉絲就投訴發現網上有大量嘅BTS VIP黃牛飛出售，當中VIP門票更索價$3,800一張，令唔少因為冇從入手買VIP門票嘅粉絲，只能購黃牛飛來睇騷。而本報聯絡主辦單位，暫時仍未有回覆。