古天樂、黃愷傑、關楚耀同妹妹關美薇、林煒珽同鄧愛嘉等等，噚晚喺金鐘舉行嘅百年靈手錶活動。古仔喺台上話自己好鍾意玩具，因為玩具背後都有佢嘅故事，正如手錶都係一樣，有佢歷史同優美設計，男士揀錶代表自己品味，自己都有興趣睇手錶生產過程。手錶品牌CEO就邀請古仔去瑞士睇手錶生產過程，以及送咗隻錶俾佢。點知古仔攞住隻表影相時，唔小心跌咗隻錶落地，搞到古仔勁尷尬，即刻打圓場話：「隻錶嘅防撞力都好強。」

古仔接受訪問時，話自己儲咗過百隻錶，講到有直播遊戲邀請古仔做代言人，早前遊戲公司安排咗古仔進行直播，引嚟350萬網民等候，點知古仔只係同網民互動40秒，搞到網民鬧爆，問番古仔呢件事，佢話：「我冇回應。」問佢係咪唔知有咁嘅安排，佢再話：「冇回應。」再問佢驚唔驚網民不滿，佢話：「我都係冇回應。」

至於古天樂成為新一屆香港演藝人協會第十三屆理事會會長，佢話：「好開心，希望我可以將新動力同想法帶到去會上邊，希望幫多啲藝人。」至於有乜計劃佢就話稍後公佈。問到佢成日拍戲，o依家做埋會長會唔會好難分配時間？古仔話：「我會盡量抽時間。」會唔會減產？佢話：「時間都係自己運用處理㗎啫。」佢話嚟緊會開戲，又話自己剛喺韓國返嚟，喺當地拍Juno部《風林山火》要喺雪山拍，當地零下幾度，凍到手腳好痛，貼好多暖包都冇成效，農曆新年佢會留番喺香港同家人過新年。

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent