當年今日
關於我們

概念車:
標緻RC概念跑車跑格鮮明

蘋果日報 2002/03/21 00:00


標緻車廠喺今屆日內瓦車展上,展出咗全新嘅RC概念跑車;流線形嘅車體設計及極富跑意嘅車廂布局,可算係RC系列嘅賣點。而分別配用於RCSpades(黑色)嘅2.0公升電油引擎,以及RCDiamonds(紅色)一台2.2公升柴油引擎,都能夠提供不錯嘅動力輸出數值。若此車能正式投產的話,相信定能惹來不少車迷垂青。
流線造型具吸引力
以Coupe跑車形象出現嘅RC,無論RCSpades(黑色)定係RCDiamonds(紅色),佢哋嘅車體設計都極富流線形,加上四輪18吋胎軨嘅襯托下,一派高性能跑車形象完全表露無遺;而一對低斜及照明度十足嘅頭燈,亦能令新車造型更具霸氣外,前輪後方更畫有兩塊撲克牌,並畫上分別係葵扇或街磚嘅圖案,以便車迷能將RCSpades(葵扇)及RCDiamonds(街磚)分辨出來。
車廂跑意盡現
至於車廂布局方面,廠方亦為其布置得跑意十足;除以鮮紅色作為主要色調外,前排一雙桶形跑車座椅,亦能給予你充裕嘅承托感,但後排卻略嫌狹窄。而三幅式軚環把持感不俗外,電子表板更能清楚顯示各項行車資料,閱讀甚為方便;同時,車內設備亦見一應俱全,加上鋪排得簡潔有序,使用時十分方便。
引擎輸出強勁
正如引言所述,不同型號嘅RC概念跑車係配用不同嘅引擎;其中RCSpades一台2.0公升電油引擎,馬力輸出為186匹,而RCDiamonds一台2.2公升柴油引擎,馬力輸出則達180匹,加上極輕嘅車重,難怪佢哋兩者都可以有出色嘅性能表現啦。