【預告曝光】小栗旬真人版《銀魂》開殺界
小栗旬銀魂坂田銀時
由小栗旬主演嘅《銀魂》真人版電影,已經公開首個預告片。
空知英秋筆下嘅日本人氣漫畫《銀魂》拍成真人版電影,獲安排喺明年夏天上映,由小栗旬飾演嘅主角坂田銀時、菅田將暉扮演嘅志村新八,以及橋本環奈飾演嘅神樂日前已經公開咗角色造型,電影今日亦公開咗首個預告片。
片段開首見到小栗旬飾演嘅坂田銀時拎住「洞爺湖」木刀,之後就滿身鮮血,預告主要大賣佢打鬥嘅場面,之前小栗旬嘅海報被網民嫌執得太勁,預告入面都見到有佢嘅大特寫鏡頭,五官當然比海報上嘅自然得多。
至於「志村新八」菅田將暉同「神樂」橋本環奈都有喺預告亮相,片段入面菅田將暉一臉愕然,同埋大叫,唔少網友都讚佢能夠演到志村新八嘅神髓。