電影《五個小孩的校長》噚晚喺銅鑼灣舉行慶功,電影上映4日,票房550萬,成績不俗。
噚晚主角古天樂,楊千嬅,監製陳木勝,老闆林小明以及太陽娛樂老闆周焯華,連埋戲中四個小朋友都有出席,惟「珠女」因病缺席。
楊千嬅表示為咗呢部戲,之前去咗內地9個城市,合共49間戲院宣傳:「仲會去馬來西亞同台灣,自己之前一個星期去咗9個城市,好開心,可以一次去晒,同埋戲中小朋友都有同佢哋一齊去。」咁一星期冇見囝囝Torres,會唔會掛住?佢話:「唔會呀,可以facetime見到,o依家都大個啦,媽咪幫手睇住,唔會擔心。」
佢同戲中小朋友好好感情,問套戲完咗少見面?佢話:「唔會,我哋有facebook,可以成日網上見。」佢仲笑言遲啲套戲開拍續集,叫《6個小孩的母親》,仲係古裝同古仔做外父外母。
古仔就話:「好開心見到班小朋友生性,有個病咗冇嚟,今次戲內每個角色都好盡力,特別係小朋友。」問之後會唔會少咗同一班小朋友見面,古仔話:「今日有啲感觸,佢哋着晒畢業袍。」珠女病咗會否探佢?佢話:「之後有機會見到嘅。」會否搞活動見面?古仔就話會借機會同千嬅一齊同小朋友見面。
周焯華原來唔想上台合照,但就俾林小明拉佢上台,仲係咁「隊」支咪俾佢叫佢講2句,佢就尷尬話:「多謝啦,唔使啦。」之後仲問林小明「我走得未呀?」就返落台。