方力申、周嘉莉、葉芷如、孫耀威、陸詩韻等，噚晚喺圓方出席電影《我們的6E班》特別放映場，周嘉莉戲中做訓導主任，但佢個樣一啲都唔惡，佢話：「因為係冼國林師傅嘅戲，佢話得就得，化個老小小嘅妝，我有問番以前嘅訓導主任行為舉止要點。」

嘉莉又笑話好期待同男主角孫耀威有親熱場面，因為鍾意咗對方10幾年，但最後發現係冇親熱戲。葉芷如即笑話：「佢(孫)係我對手呀！」問嘉莉點解唔向冼師傅要求加場親熱戲？葉芷如又搶答：「師傅係長輩，叫你做乜就做乜，叫扮校草都要衝過去。」嘉莉又自爆本來同范振鋒有場親熱戲，不過范振鋒當時就話自己老婆李思欣在場會睇到，拒絕咗佢嘅好意，最後都冇錫到，所以銀幕初吻仲保留住。

小方戲中做一名贊助商嘅角色，電影最後勉勵學生，小方話：「o依家好多學生同老師都面對緊暴力同歧視，仲會用把尺去(量)度人做得啱唔啱。」以前有冇遇過暴力？小方笑話：「冇，反而有歧視，去外國讀書，我又靚仔過人，游水又快過人，咁咪俾人歧視囉！不過我讀書唔好，都俾人歧視。」

之前網上有文章，標題寫小方成功o氹番前度女友Stephy，仲話希望儲錢喺2018年娶Stephy( 新聞連結： http://bit.ly/2xHlCd8 )。小方話有睇過報道，網站講明係亂嗡24，內容大部份都唔係事實：「冇大陸劇搵我，我亦好耐冇做電台訪問，當日好多朋友打嚟問我，睇標題冇睇內容，一間傳媒都冇搵過我，就知擺明係流料，Stephy亦冇搵過我。」會唔會復合？小方認真咁話：「冇，我亦唔使儲錢結婚，不過儲錢都會嘅。」