《星球大戰》系列第八集《星球大戰：最後絕地武士》（Star Wars：The Last Jedi）定於本月中在全球上映，飾演女主角Rey嘅25歲女星黛絲烈尼（Daisy Ridley）近日受訪承認只簽咗三部《星戰》片約，即係拍完2019年12月上映嘅《星戰9》就會功成身退。

黛絲訪問中透露：「真係好高興拍攝第三集，所有都很圓滿，因為我只簽了三部片約。」未知佢會否再為《星戰》電影演出。其實，早前迪士尼已公佈Rian Johnson會執導全新三部曲系列，故事亦會重新洗牌，將引入《星戰》系列從未涉及嘅銀河新角色，包括Rey、天行者、莉亞公主、漢蘇奴、侏兒、R2D2、C3PO等角色將成歷史。

為替《星戰8》造勢，眾星日前齊腳亮相名嘴Jimmy Kimmel節目，Jimmy由白兵護送登場，除黛絲烈尼、麥克咸美、阿當載華、約翰保也加（John Boyega）、奧斯卡依撒（Oscar Isaac）、羅娜丹（Laura Dern）及導演等之外，深受影迷歡迎嘅機械人BB8都有碌到錄影廠，而節目更公開侏兒聖誕樹，相當搞笑。《星戰8》將於本周拉隊到東京宣傳，演天行者嘅麥克咸美（Mark Hamill）偕導演Rian Johnson會率阿當載華（Adam Driver）等主角出席周三嘅紅地毯盛會，周四舉行記者會，不過黛絲烈尼日前因檔期問題臨時甩底。

更多娛聞，喺晒《娛果》
http://fb.com/appledailyent