唔知係唔係英超球星都冇本心，繼愛華頓前鋒朗尼後，又有球星搞小三醜聞，今次就到前季冠軍李斯特城嘅隊長韋斯摩根，佢唔單止喺倫敦包養小三，仲搞大埋個肚，斷正之後，仲俾長期女友踢出屋企。

韋斯摩根想玩齊人之福，已經好小心，安排小三Karla Morell住喺倫敦，自己同長期女友Sheneen Fisher，以及兩個仔仔，就住喺諾定咸，以為相安無事。但摩根竟然搞大埋Karla Morell個肚不特止，小三竟然夥同朋友，向Sheneen爆大鑊，諗住可以入宮。Sheneen本身係女強人，大把錢唔使靠摩根，嬲起上嚟已經趕咗摩根出諾定咸大屋，打算自己一手一腳湊大一對仔。摩根就算可以同小三雙宿雙棲，睇嚟負心漢之名都好難走得甩。