黃又南、袁澧林、曾俊華同張堅庭今日喺青衣城，為有份聲演嘅動畫《超級無敵世界波》出席活動，跳出幕前、首次聲演嘅前財爺曾俊華表示好享受：「族長呢個角色好關照佢哋嘅族民，好關心佢哋嘅生活，亦都非常關心成個價值同傳統點樣可以繼續落去，所以我特別鍾意呢個角色，希望大家都欣賞。」又南話：「我哋係分開錄，所以我都係早幾日先知曾生有份聲演，同前高官合作，我覺得幾榮幸。」

袁澧林透露今次係首次聲演，幸得有導師教導：「我要聲演踢波嘅女仔，導師叫我用番自己把聲，不過要調整番，要用氣，所以學到好多嘢。」又南話：「我每次錄，把聲都會沙晒，每日都要配15、16個鐘，其實把聲好重要，而且每次錄完都要send去外國畀佢哋聽吓啱唔啱，都幾緊張，好彩都過關。」

講到今屆2018世界盃，又南表示一定會睇，問到會唔會飛去俄羅斯睇賽事？佢話雖然當時要拍戲，但會相約一班朋友一齊睇世界盃，佢話：「一個人睇會悶悶哋，應該開派對一齊嗌吓。」又南話自己係捧巴西隊嘅。

此外，又南表示接咗一部電影，飾演一名癌症病人，佢話：「要減近10磅，唔捨得㗎，始終用咗4、5個月為之前嘅演唱會操到成績出嚟，唔緊要，總有機會再操番，下次演唱會再突破。」

精選娛聞，喺晒《娛果》
http://fb.com/appledailyent