康宏（1019）主要股東、內房股佳兆業（1638）少東郭曉群入稟高院，要求將舊年底康宏股東特別大會（EGM）嘅結果推翻，本周案件開審，郭曉群亦因此首度現身，可惜佢一離開法院就戴上口罩，唔去法庭始終唔知佢廬山真面目。
不過佢爸爸，即係佳兆業主席郭英成認真係廿四孝老豆，業績期都抽空陪阿仔聽審。噚日喺佳兆業業績會上，郭英成笑住話:「做老竇支持吓個仔都好正常」，又指自己精力充沛，時間多過人，可以日做18粒鐘，所以就算聽審都唔會影響到佢嘅工作。至於係咪繼續日日去法庭陪仔呢，佢就話要視乎時間安排。
佢冇提到阿仔係咪喺佳兆業返工，但有消息人士就報料，指間唔中都會見到郭曉群喺公司出現。