雨傘運動後，黃耀明不獲寰亞唱片續約，雖然失去了遮蔭的大樹，但明哥沒有坐以待斃，將於下月1至3日假旺角麥花臣場館舉行3場「美麗的呼聲」演唱會，唱盡麗的和亞視劇集歌曲，由他成立的人山人海公司自資，明哥笑說：「都仲畀得起，要大家多多支持。」

黎小田好重要

4月1日開騷，剛巧是亞視釘牌之日，明哥說：「呢個騷未必一定為賺錢，我想了咗心願多啲，因為我做完顧嘉煇音樂會，其實想做麗的亞視，大部份嘅歌都係盧國沾同黎小田寫，希望對香港流行音樂嘅前輩同先鋒者致敬。」
數到廣東歌歷史上最重要的人，明哥會想起：「當然係顧嘉煇、黃霑，黎小田其實都好重要，我覺得佢有少少被underrate，雖然我比較少唱許冠傑嘅歌，但冇咗佢冇廣東歌！煇哥寫嘅歌好有香港味道，當然再加上佢同黃霑合作作品，完全紀錄香港嘅黃金時代，黃霑嘅詞同許冠傑好唔同，許冠傑係平民百姓啲，黃霑係人生哲理啲，呢四個人對我嚟講係好重要前輩。」