第十二屆KKBOX風雲榜今晚喺台北小巨蛋開騷，除咗S.H.E.嘅Hebe、五月天等等，仲有好多表演嘉賓，包括呢位－－「宇宙巨G.E.M.」鄧紫棋。

不過喺G.E.M.出場之前，吳克群喺8點就先以嘉賓身份出場，佢只係唱咗一首歌《孤獨是會上癮的》，睇番啲歌詞「孤獨是會上癮的，就算我不承認，你離開後心就開始沉淪。」好似有啲弦外之音喎……唔知同之前舊事重提同超蓮嘅戀情有冇關係呢？

G.E.M.同吳克群中間，大會安排咗韋禮安唱咗幾首歌同廣告，俾足休息時間，似乎有意隔開兩人出場次序。

講番G.E.M.，呢次佢係第一次登上咗KKBOX嘅年度風雲歌手，所以喺8點15分出場之後都有兩首歌唱下，而平時做開「時裝車禍」嘅佢，今次終於正常番，揀咗件白色連身褲出現，重點係，呢套衫將佢大大個心口展露出嚟，即係好大條事業線囉，佢條頸鏈仲俾佢嘅身材夾到實一實添。G.E.M.喺唱完《泡沫》之後，向觀眾大叫：「Hello大家好，我係『漿』鄧紫棋！」再唱《光年之外》。