郭思琳同吳雲甫噚晚喺香港仔為「環亞美神大賽（香港）2017」擔任導師，教導12位佳麗嘅拳擊格鬥姿勢。郭思琳表示：「都係將自己嘅（G-1格鬥）經歷分享下，o依家我都有繼續練，仲有上電影動作訓練班。」問佢係咪想做打女？郭思琳認為都係一條出路，唔想淨係拍文戲。咁怕唔怕打到周身傷？郭思琳話：「打G-1嘅時候太傷，我o依家練大咗個膽。」如果整親可能手尾長喎！郭思琳話：「其實都唔怕，我o依家已經有舊患，一轉天氣，風濕就會提醒我。」

講番12位佳麗，由於呢個大賽係以「素人變女神」為主題，所以佢哋未必好靚，但每個人都有自己嘅獨特之處，鍾意唱歌嘅10號田小昂，佢自信心爆棚咁話：「每個人唱歌都有唔同風格，我相信我能夠感動觀眾；決賽當晚有泳衣環節，我相信會攞到幾穩陣嘅分數。」至於1號陳初戀，呢個名已經相當特別，佢話：「係我藝名，因為易記。」初戀仲表示佢嘅必殺技係笑容同酒窩。