【鬧過阿佘】前大台火爆導演Gary疑揸車抽頭唔打燈 遭網上公審
蘋果日報 2020/03/20 17:53
粗口Gary張永豪抽頭
（Facebook截圖／資料圖片）
前大台導演張永豪(Gary)向來有「躁狂導演」之稱，一直被指有高層曾勵珍撐腰。昨日Gary又被人公審，有網民在「香港突發事故報料區」Facebook專頁，上載一段19秒的短片，見到Gary用手機影向對面的車，當時他遭對方狂鬧：「打燈吖嘛，話抽就抽，剛才好x型㗎，掟嘢過嚟。」Gary不甘示弱反拍對方，亦有用粗口問候：「x你老x，你唔撞過嚟。」
該網民透露事發時間在昨日下午4時於柯士甸道，留言：「抽頭又唔打燈提示人知，話抽就抽..差啲撞埋！仲要發脾氣掉嘢過嚟，一味只識爆粗...叫人撞佢！你想死就死遠啲，咪喺馬路上害人啦！（有師兄同我講，佢係無綫到做導演（愛回家），無綫冇人唔識佢『張x豪』『永豪』..出晒名X人一個！有高層珍姐撐腰，當啲人唔係人對待！」其他網民就一面倒鬧爆Gary，覺得抽頭不打燈會害死人。
事實上，Gary惹禍已非第一次，曾鬧過初入行的佘詩曼和蒙嘉慧，阿佘曾公開說他「質素太差」。2012年，被爆拍攝劇集《心路GPS》時粗暴對待「神獸天使」劉蔚萱，由於女方拍一段戲足足NG了兩個多小時，Gary親身教戲時，明知女方怕田雞，仍將有田雞味的膠袋笠向對方，又撞頭埋牆，結果兩人都要被「照肺」，並在《東張西望》上演一幕大和解，劉蔚萱喊住握手言和。至2016年，Gary又被傳媒影到拍攝《愛‧回家》時，爆粗兼用劇本打魏焌皓個頭，之後被勒令停職，據悉現已離開無綫。
前大台導演Gary被指揸車抽頭不打燈（香港突發事故報料區Facebook截圖）
Gary曾被指粗暴對待「神獸天使」劉蔚萱（資料圖片）
教戲時用有田雞味的膠袋笠頭（資料圖片）
女方倚在男藝人身上嚎哭（資料圖片）
阿佘拍《生命有Take 2》時，曾被Gary鬧爆。（資料圖片）
魏焌皓（中）曾遭Gary用劇本打頭（資料圖片）