美股周二晚大散,周三晚大升,港股周三冇市,昨周四開番,恒指大升316點,假前揸Call輪贏大錢,其實有運氣成份在內。假如周三有市,可能已經因為美股碌低而將啲Call輪止蝕掟出街離場。處變不驚,或者處驚不變者,先至真正成為贏家。
一啲地產股升到開巷,值唔值得再高追佢哋嘅Call輪,見仁見智。揀啲正股冇升得咁勁嘅相關Call輪,可能比較實際,風險較低。
滙豐(005)屬「溫和派」,收106元,升2元,算係落後恒指,揸滙豐Call輪,面對或會出現的回吐壓力應該會少啲。9845收1.03元,升11仙,未跟貼正股,隻輪12月初到期,負溢價0.7%,槓桿率10.3倍,諗得過。9908更加具有爆炸力,明年1月到期,輪價75仙,溢價1.4%,槓桿率14.1倍,有3個幾月壽命,相等於每個月溢價唔使0.5%,唔貴。
9914可炒落後
長實(001)升6.1%,和黃(013)升2.1%,亦係落後大市同落後大股東,有機會跟番大隊。和黃Call輪,同正股一樣,博追落後。正路熱門對象始終係9914,明年1月夠鐘,輪價57仙,溢價5.1%,槓桿率10.1倍。9757壽命長多兩個月,數據其實都唔錯,缺點係交投冇9914咁旺。
章盛