「第40屆十大中文金曲」頒獎禮請嚟著名填詞人向雪懷同林慕德擔任頒獎嘉獎，向雪懷先出場，頒發第1及2首十大中文金曲，佢先搞咗個爛gag，問港台點解搵佢做頒獎嘉賓，然後佢話：「我知喇，港台請唔到聖誕老人頒獎，就請個四眼老人。」

向雪懷又講到歌曲有自己的生命，有時自己覺得好，人哋覺得唔好，佢話：「我記得1987年嘅今日，《我的故事》拎咗獎，陳百強覺得好，大家覺得好，港台當然都覺得好。《月半小夜曲》，我覺得好，但克勤唱得唔係幾好。我好嬲你，克勤！但30年後全中國人唱得最多嘅歌，係《月半小夜曲》。所以自己覺好就得，人哋幾時覺好唔重要，唔好氣餒各位年輕人。」

至於頒發第5及6首十大中文金曲嘅音樂人林慕德頒獎前痛批以前嘅教育署，身為巴基斯坦裔香港嘅佢，居港多年都唔識睇中文，林慕德自言係教育制度受害者，「細個冇好好教我中文」，一到「蝴蝶」就唔識，漸漸就放棄咗，佢仲話：「所以我o依家要幫香港教育局了解呢個咁大問題，幫咁多小朋友。」

更多娛聞，喺晒《娛果》
http://fb.com/appledailyent