今年入圍視帝視后嘅競爭都好激烈，當中去年憑《來自星星的你》封視帝嘅金秀賢，今年終於畀面出席，事關佢去年有工作喺身，所以就冇同《星星》嘅好拍檔全智賢齊齊領獎，今年佢就再憑《製作人們》入圍競逐中篇電視劇男子最優秀演技獎，佢上個月已經憑《製作人們》奪得第8屆韓國電視劇節頒獎禮的演技大獎，當時佢因為冧莊得大獎，所以喺台上爆喊，唔知今日佢如果攞獎會唔會又喺台上喊呢？

而喺宣佈賽果之前，金秀賢亦都率先蒲頭行紅地毯見下粉絲，搶返少少人氣先，再次梳上all-back頭嘅佢現身時表現輕鬆，仲笑笑口咁舉起晒兩隻同大家打招呼，似乎好有信心今晚再做視帝。

難得男神落區，兩旁圍觀粉絲都勁興奮不停尖叫，仲伸晒手出嚟希望同男神有所接觸，不過金秀賢就未有行近粉絲，只係一直揮手同大家示好。