情人節夜紅隧竟然「鬧鬼」！噚日凌晨3點鐘，八方喺銅鑼灣蒲完搭的士過九龍，的士司機入咗紅隧冇耐突然驚叫：「嘩！點解有個人喺隧道入面行㗎！」八方俾佢嚇一嚇，抬頭一望，赫然見到一個高大身影喺左邊不足一呎闊嘅石壆上行去九龍方向！嗰日啱啱過完情人節唔係鬼節喎，唔係咁猛啩？
八方身為新聞工作者，即刻冷靜落嚟，拎部相機拍低呢個「奇景」。再睇真啲呢壇嘢係人定係鬼，知唔望猶自可，一望弊家伙！真係有鬼，不過係「鬼佬」！呢位洋人睇落廿零歲，面帶笑容卻掩不住眉宇間一絲哀愁，莫非情人節觸景傷情，諗住行隧道過九龍散心？
當時紅隧單管道雙向行車，車來車往，加多個「行人」險象環生，「有冇搞錯！點解畀佢入到嚟？啲職員係唔係瞓晒覺！」的士大佬都覺得匪夷所思。八方過海後即刻落車諗住截住呢位行路過九龍奇人，點知一直唔見佢「上水」。

八方向香港海底隧道管理公司查證，當值嘅隧道經理黃先生初時好老定，「邊有可能有人入到隧道，我哋兩邊出入口都有人睇住㗎！」黃經理仲懶型咁窒八方，「紅隧只畀車行唔畀人行㗎，1972年肥肥開幕嗰陣都要坐車過海，不過我睇你當時仲未出世！」
好彩八方有相為證，黃經理至嗱嗱臨翻睇閉路電視錄影帶。之後黃經理態度180度轉變，好耐心咁解釋。「大約凌晨３點有位外籍男子進入北行線管道，但好快就俾職員喺閉路電視發現，佢行咗約120米，就俾職員用工程車載走，逗留喺隧道內唔夠兩分鐘。」呢位洋人遊客持歐洲護照，聲稱唔知道隧道只畀車行，所以諗住徒步橫渡維港。職員信佢唔係蓄意闖入，抄低資料就放人。由於唔使封隧道，所以冇報警，亦冇通知運輸署。
黃經理話管道港九出入口都有人24小時昅實。聽落好似守衞森嚴，實際好兒戲喎，個遊客如入無人之境真離奇，有冇人為疏忽？運輸署話由於紅隧變成「行人隊道」期間冇封閉，所以唔使「嘈醒」緊急事故交通協調中心。官員繼續大覺瞓。其他隧道話未試過有人闖入，大欖隧道曾有流浪牛同流浪狗闖入。隨便行入行車隧道會犯法，最高可被罰5,000蚊同坐監6個月。