馬迷對賽事監察已失去信任!
祁禮謙阿Joe賽事監察
「文藝學家」被質疑監察放水引起全城聲討,正所謂衰開就衰,競賽董事小組喺上次日馬(11日)果然又出事。
當日第九場因墮馬意外引發直路嚴重干擾事件,擠阻牽涉好幾隻馬,但小組竟然冇即時打出研訊燈號,跟手宣佈派彩作實,呢個輕率求其嘅做法又再惹火普羅馬迷,質疑小組有冇認真睇清楚發生乜事。
賽後有馬迷嘈馬會唔取消呢場馬,相信都係一時火遮眼,馬迷都明白事理,知道陣上意外唔慌有得回水,關鍵係競賽小組嘅處理方法,好似無事發生咁,轉頭就話派彩作實,難怪好多馬迷都懷疑競賽小組冇睇清楚發生乜事,好似趕住收工hea做。
首席受薪董事祁禮謙賽後照例繼續死撐,話跟足賽事規例做,唔使打研訊燈號。其實有咁嚴重干擾事件,影響咁多隻馬,有常識都應該即時打燈研訊,做樣都話畀公眾馬迷聽有做緊嘢。家陣乜都唔做,反映祁禮謙完全唔識應變執生,仲好意思拎賽事規例出嚟撻人,若只係機械式死板板執行賽事規例,求其搵個人都勝任嘅,使乜咁高人工請你做首席受薪董事?
競賽小組慣性唔認衰,日前特登開個記者會,就「文藝學家」唔罰人解畫,呢個記招畀人嘅感覺,係祁禮謙幫潘頓解釋,簡直荒謬到極。既然話潘頓身為大師傅都拉唔住重口馬「文藝學家」焗放,咁點解剛戰同樣超重口嘅「赤兔寶駒」,潘頓又可以留得住?
競賽小組自己都冇做足本份,做事甩甩漏漏,「文藝學家」練馬師高伯新冇問,而季初小組曾經要求鄭雨滇交出戶口紀錄,今次係咪全方位去跟進潘頓將「文藝學家」放頭嘅動機先?競賽小組揩完一鑊又一鑊,好似冇王管咁,公眾馬迷對小組嘅監察已經完全失去信任,馬會再唔回應公眾嘅不滿,最後真係唔知點收科。