【《蘋果》專訪】「長腿叔叔」捐22萬助澳洲升學 梁雪瑤﹕唔需要還錢，當畀山區兒童

蘋果日報 2018/12/08 00:00

亞洲小姐梁雪瑤長腿叔叔
    新一屆「亞洲小姐」即將誕生，15號就會舉行總決賽，話晒都係香港人搞嘅節目，香港賽區冠軍梁雪瑤（Sheryl）被睇高一線。
    梁雪瑤，今年25歲，唔係含住金鎖匙出世，自幼一家六口，父母、弟妹連嫲嫲逼在數百呎公屋。幸Sheryl好上進，自幼發奮讀書，入CityU讀咗兩年，再去澳洲一年完成建築系學士學位。由於家貧，去澳洲一年要22萬元學費，Sheryl父母根本負擔唔起，幸有好心人襄助，Sheryl日前在銅鑼灣接受《蘋果》專訪時透露：「好感恩，爸爸有一位朋友，係好好uncle，願意支持我去外國讀書，幫我畀學費，就好似長腿叔叔一樣。因為uncle本身都富裕，唔需要我還錢，當係捐款，好似幫助山區兒童咁，但我都會盡力回報還錢嘅。」
    回港後，Sheryl很快找到關於設計嘅工作，月入近二萬元，但佢自言頂唔順每日對住電腦，工作一年後毅然辭職去選美。可惜選港姐一年落選，第二年又落選，難免會失望。Sheryl話：「除咗選美，其實我都想轉行發展，有賣護膚品同化妝品，咁屋企人點都有少少怨言，因為如果我考埋建築師牌就會有四萬蚊以上收入。」Sheryl坦言選港姐是兒時夢想，佢話：「細個會同細佬妹扮選港姐，我以前係肥妹仔，但都多人讚靚，個個叫我去選美，去年仲做足準備，箍牙同減肥瘦面，唔能夠入圍(港姐)都唔開心，但冇喊，只係匿埋幾日。」
    既然有自信，港姐唔得，Sheryl轉戰亞姐，並一擊即中成為香港賽區冠軍，佢話對亞視有信心：「以前嘅亞視畀咗啲唔好印象大家，但重整革新後，又未聽過拖糧，我就定期有糧出，人工ok，維持到生活，可以畀家用，咁屋企人都開始支持我，有睇我比賽，又整嘢畀我食，欣賞我咁堅持。」
    對於網上好多負評，指今屆亞姐質素差，Sheryl不以為然話：「有睇，但覺得唔緊要，佢哋唔係睇事實全部，嚟緊畀大家了解我多啲，會對我改觀。」問到有冇男朋友？佢話：「有嘅，佢係內地人，大家喺澳洲讀書嘅時候認識，拍咗拖三年。」問到係咪富三代？佢笑晒口話：「哈，佢嘅私人嘢唔講咁多，我哋每日都會視像，無論我參選港姐或亞姐，佢都好支持。」
    採訪﹕嵐山、張俊銘
    攝影﹕沈健程
    場地﹕El Born(Causeway Bay)
    精選娛聞，喺晒《娛果》 http://fb.com/appledailyent
    empty
    （攝影：沈健程）
    empty
    梁雪瑤選咗兩屆港姐都落選，估唔到選亞姐會一擊即中，成為香港賽區冠軍。
    empty
    梁雪瑤屋企唔算有錢，赴澳洲升學都係由uncle資助學費。
    empty
    梁雪瑤形容uncle好似長腿叔叔一樣，令佢可以夢想成真。
    empty
    梁雪瑤話喺澳洲都要半工讀，有出外做part time幫補生活費。
    empty
    網絡上不少人抨擊梁雪瑤個樣唔夠靚，但佢就好有自信。
    empty
    梁雪瑤表示對亞視好有信心，認為未來網絡電視係大方向。
    empty
    小時候嘅梁雪瑤肥嘟嘟好可愛。(受訪者提供)
    empty
    細細個就夢想成為香港小姐冠軍。 (受訪者提供)
    empty
    Sheryl在澳洲完成建築系學士學位，一家人都有去影畢業相。 (受訪者提供)
    empty
    陳豪曾到過梁雪瑤屋企拍廣告，佢大讚對方冇架子。 (受訪者提供)
    empty
    集郵對象仲有王浩信。(受訪者提供)
    empty
    梁雪瑤自爆有位拍拖三年男友，未肯透露對方是否內地富三代。 (ig圖片)
    empty
    (左起)香港賽區亞軍張右雨、冠軍梁雪瑤、季軍林孜沫。 (資料圖片)