網站Google噚日公佈由4月6日到4月12日嘅一個星期之內，佢哋搜尋器最熱爆嘅娛樂關鍵字，大家最關心嘅係前無綫藝人王敏明因淋巴癌復發病逝嘅新聞，舞蹈員出身嘅佢曾幫張國榮同譚詠麟拍過MV。佢嘅名喺統計期內喺Google搜尋器出現次數最多，連帶佢老公區偉麟、弟弟王維德亦分佔第4及第5位，證明大家關注娛樂新聞嗰時都好有愛心，關心當事人嘅身邊人。

楊洛婷比堅尼第3

至於第2位係有線主播梁靜雯疑燒炭離世嘅消息，都係一啲唔太令人開心嘅新聞。到佔據第3位嘅搜尋就比較陽光，人妻楊洛婷（Rabee'a）同老公去咗巴哈馬度假，相信吸引嘅地方係Rabee'a大晒三點式。隨後第6至10位嘅順序，係前台灣宅男女神、今年傳出懷孕嘅方志友、余文樂、美國女唱作人Ariana Grande、港姐張名雅同李錦聯，相信大家都係關心李錦聯同大王安德尊喺節目上互片嘅新聞。
至於本報近日最受關注嘅新聞頭三位，分別係經常喺節目講「好犀利呀！點解嘅？」嘅吳若希，同埋「杯麵魔術」被踢爆穿崩嘅魔法王甄澤權，當然Yumiko產女同埋BB女入ICU都係大眾關心嘅。
撰文：馮仁昭