曾執導電影《艋舺》的52歲台灣導演兼演員鈕承澤，今日傳出性侵女工作人員嘅消息，有台灣傳媒報道指，鈕承澤喺拍攝由任賢齊主演的電影《跑馬》期間，懷疑性侵一名女性工作人員，而受害者今日下午由朋友陪同下到警局報案。

據台灣傳媒指，受害人加入劇組之後，鈕承澤就一直對佢照顧有加，更大獻殷勤，不過大家以為呢啲行為只係「搞氣氛」而冇任何懷疑，直至上月底，鈕承澤以狀態問題取消咗原定嘅會議後，但佢之後就傳短訊畀受害人嘅上司，相約對方去自己屋企傾偈，而同時鈕承澤又表示可以帶埋受害人一齊，之後兩人到達鈕承澤嘅屋企，雖然當時屋內仲有好多人，但喺眾人離開後，鈕承澤就開始對受害人做出性侵行為，而受害人被侵犯後亦即時辭去劇組工作及由朋友陪同下到醫院驗傷，至今午到警局報案，警方將傳喚鈕承澤到案說明。

而台灣《蘋果》喺事後亦有為咗呢件事聯絡過鈕承澤，不過佢冇接電話之餘，就連短訊都冇睇，而《跑馬》監製亦表示對事件毫不知情。至於男主角任賢齊嘅經理人亦表示唔知有呢件事，只透露近日拍攝嘅時候，睇唔到劇組或鈕承澤有任何異樣。

精選娛聞，喺晒《娛果》
http://fb.com/appledailyent