真人版電影《進擊的巨人》8月中上映，巨人嘅特技化妝師JIRO日前秘密嚟香港，幫藝人謝安琪化咗個幾可亂真嘅老妝。八方託朋友搵佢傾偈，對方仲即場獨家示範咗少少特技化妝，包括喺一個男仔面部示範人體彩繪，一對好平面嘅眼睛，JIRO喺眼眶眼肚加陰影再加滴眼淚後，當堂畫龍點睛。
JIRO查實做咗14年特技化妝，一年前成立藝術創作團隊KAGE6SHA（影武者）後，開始鑽研人體彩繪，公司最近傑作係為《進擊的巨人》設計3個主要巨人造型，包括超大型巨人、艾連巨人同戲中另一原創主要巨人，其中超大型巨人高約兩米，身體、表情都郁得，要由7個人合力完成。3個巨人耗資幾千萬日圓，以逾半年時間製作。

少女變臉北野武

JIRO團隊作品仲有「TAKESHI KITANO—北野武」，將少女化妝成勁man嘅北野武；「TRANSFORMER」就將一個男人化妝成變形金剛嘅大黃蜂。想睇佢嘅作品可以去 https://www.facebook.com/kage6sha 。