近排忙住宣傳新戲《春嬌救志明》嘅楊千嬅，由3月尾開始已經忙到踢晒腳，莫講話帶囝囝去玩，呢段時間，連見一面都難。

噚日千嬅出席《春嬌》宣傳活動時，亦有講話：「前排真係好忙，所以之前復活節有幾日假，都盡量陪吓囝囝。細路仔唔玩會唔開心，所以一有時間會盡量陪佢玩。」(新聞連結： http://bit.ly/2otLpOu )

又要拍戲又要宣傳，分身不暇嘅千嬅，前日(20日)下晝3點15分，俾讀者見到同媽咪、囝囝Torres到迪士尼樂園遊玩，現場有一名樂園嘅職員帶領佢哋。由於千嬅個紫色頭夠sharp醒，樂園唔少遊人都認得出佢，嗌佢個名又拎手機影相，不過由於有職員帶佢哋喺特別通道出入，所以遊人冇咁輕易埋身。據讀者講，Torres表現乖巧，跟喺媽咪身邊一直冇扭計，又同媽咪咬耳仔傾偈。從讀者提供嘅相片中，見到千嬅同Torres玩緊明日世界園區嘅太空飛碟。婆婆坐前面，千嬅兩母子坐後面。機動遊戲未開始前，千嬅就叮囑Torres坐好，然後小心翼翼為囝囝扣好安全帶。

出名廿四孝媽咪嘅千嬅，因為年前接受一個訪問，爆囝囝Torres鍾意玩女兒家玩意，如《冰雪奇緣》嘅Elsa，嚇到千嬅「鬧到佢死」。搞到唔少網民鬧爆佢係「怪獸家長」。最終千嬅喺Ig發千字文，承認自己係新手媽咪，所以每件事都緊張大師上身。當時佢留言話：「終於因為他喜歡Elsa，認識了所有公主系列，培養了閲讀興趣，因為煮飯仔，他學懂造Brownie，今年吃到他親手做給我的蛋糕。」(新聞連結： http://bit.ly/2pZedPd )

千嬅今次同囝囝遊迪士尼，雖然唔知有冇搵Elsa公主合照，不過學千嬅話齋，做人媽媽同做小朋友，同樣係要終身學習，只要見到小朋友健康快樂成長，做父母嘅就已經心滿意足！

緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw