顏福偉前晚應科技大學邀請，擔任band騷表演嘉賓，未知是因為非現場直播，還是因為在學生面前表演關係，換上便服的他，表現明顯較在《勁歌金曲》演出生鬼和輕鬆。顏福偉甫進場，在場站立的200多名學生即興奮大叫「福仔」、「愛多80年」和「白花油王子」，又有人問他有沒有帶羽毛球拍來，引得哄堂大笑。

顏福偉先後唱了早年川鳴樂隊時期推出的歌曲《午夜場》及與鄧浩光打羽毛球的廣告歌《夢想有你》，在場學生隨即揮動螢光棒打拍子，及至顏福偉獻唱《愛多80年》時，全場學生更跟着顏福偉一起扭動身體合唱，情緒極度高漲，歌聲震撼整個表演場館。在顏福偉表演期間，不少學生爭相與他握手，又跪地送花送糖。其間顏福偉問學生：「我𠵱家個助手以前喺城大讀書，你哋鍾唔鍾意嚟我公司做呀！」全場學生聞言大叫：「鍾意！」
唱完三首歌後，顏福偉準備離場，但學生卻不讓他走，直至顏福偉encore一首《奔向明天》始肯罷休；在顏福偉離開時學生又追着他合照留念，當正他超級偶像般看待，想不到顏福偉原來冧學生也有一手，相信這位白花油王子大可改名叫「學生王子」也不為過！

之前顏福偉先後到中大、樹仁、浸大和嶺大演出，記者問顏福偉何以多間院校如此喜歡找他做騷時，他笑說：「因為自己唔使錢囉，自己唱歌之餘又可以講talk，其他歌手做唔到。」不過，是次band騷搞手之一的Angela卻否認顏福偉不收取分文才邀他做騷，因過往也有不少具知名度樂隊也曾免費演出，她們知道顏福偉做校園騷反應好才邀他做嘉賓。原來，顏福偉正準備今年與商台合作在葵青劇院開個唱，一償多年心願，他說：「其實會係一個類似CEO交流加演唱會，除咗唱歌外，我仲會請其他大公司嘅CEO做嘉賓傾偈。」
近日顏福偉演出機會和訪問不斷，可認為是貌似自稱龔如心千億遺產受益人的陳振聰而人氣急升所致？顏福偉否認道：「唔關事，我啲工作一早plan定咗，係訪問就多咗好多囉。」問顏福偉個人表演慾是否很強時，他笑道：「有表演慾先至會做娛樂圈，不過自己𠵱家鍾意演講多過唱歌。」

近年頻頻夥拍鄧浩光及奧運跳水金牌得主彭勃拍白花油廣告的顏福偉，其性取向一直成疑，儘管04年與袁潔瑩拍廣告時曾傳緋聞，但只屬煲水新聞。對於性取向問題，顏福偉前晚接受訪問時坦言：「自己好隨緣，嚟一個男仔又好，女仔又好，自己心態都會好隨緣。自己好怕痛，求不得也痛，拍拖時遇上沙沙石石又怕痛，分手又痛，所以𠵱家喺我感情上係一片空白。」

問顏福偉是否在情路上跌過、受過傷害？他說：「係，係喺99年嗰陣。」記者追問令他受傷害的究竟是男還是女時，他說：「係女性，我話隨緣啫，但從來冇同男性發展過㗎，其實我啲朋友都笑我一係包一件，一係做和尚㗎啦。」

小甜甜的爭產風波全城哄動，有網友發起網上選舉，指他日若開拍龔如心傳記電影，貌似自稱是小甜甜遺產受益人陳振聰的顏福偉是理想人選，顏福偉也表示有興趣接演這個角色。

想不到事隔數天，終有電影公司打顏福偉主意，他說：「鄭秀文以前個助手阿爽今朝（前日）打電話畀我，問可唔可以將我個電話號碼畀電影公司，話有人想搵我拍戲，但究竟邊間電影公司、開乜嘢戲就乜都冇講。阿爽話遲啲電影公司會同我聯絡，但到𠵱家我仲未收到電話。」顏福偉入行21年從未拍過電影，若然今次成事，將是其處男作。

李小姐：
我覺得佢好識搞氣氛，把聲幾好聽，同埋覺得佢好勇敢，咁多人笑佢，佢都唔理人哋點睇，忠於自己興趣。

阿偉：
覺得佢幾OK吖，學歷又好，知佢近年公司業績又搞得幾好，好開心香港有佢呢啲歌手，佢唱歌都唔錯，都好親民。

KK：
我欣賞顏福偉唔係因為近期似風水師嗰件事，係因為我覺得佢好親民，好有heart。我自己都係夾band，覺得佢唱歌都OK，幾好。

Angela：
我覺得佢有別一般歌手，形象好健康，好親切，唱歌都幾好聽，好識搞氣氛。