【讚靚最有用】姜濤向《造星II》師弟教路 冧掂花姐係重中之重
蘋果日報 2019/09/22 06:00
Aiden三甲Hugo花姐姜濤全民造星II吳啟洋
ViuTV新一輯《全民造星II》真人騷已掀起戰幔，一百位參賽者埋班進行選拔，節目將於本月底推出，一連45集真人騷重臨。去年《全民造星》一戰締造萬人迷偶像姜濤，他不僅獲得100萬獎金，更獲捧成新一代歌手及藝員，又成為組合MIRROR成員，單飛、組合、拍劇三線發展，成就參賽夢想。
新造星熱鬥之時，《蘋果》找來姜濤、陳卓賢（Ian）、Anson Lo進行新舊造星對論，三人分別揀選了心水參賽者包括大熱吳啟洋、Aiden、Hugo，細說選秀時秘技，並以MIRROR身份和師弟對話。他們提醒重點不能得罪霸氣節目監製「花姐」黃慧君，但花姐和冠軍只得一個，Anson Lo說：「唔好諗爭花姐，反而可以主動幫花姐做好多嘢，例如佢肚餓時千祈唔好問佢想食乜，直接幫佢安排佢就會覺得你全能好有用、good boy。」姜濤參選時為花姐大愛，他拋出最大貼士：「花姐嬲時記得要讚花姐靚就冇事。」Ian則為大家分解參選過程中遇上爭執拗交時做法，他說：「每人有自己想法原則，最終目的想件事好，呢個比賽好玩地方唔係自己一人，係團隊精神先令你行得更遠，大家要坐低傾掂佢。」
三位吳啟洋最為新造星大熱，Aiden則以演戲唱歌晉身圈中，Hugo外觀不及前者俊朗，但明顯在演技方面跑出，每當面對鏡頭演繹時七情上面，他自稱從小到大愛搞鬼搞馬，今次將本身性格運用在表演上，以真性情拉票。大師兄姜濤貼中吳啟洋，他解釋：「今屆參賽者中相對最全面一位，身高或外型表演乎合大眾style同普遍標準，第一次公開試時已有驚喜，有啲人天生有一種感覺令你吸引佢。」姜濤最欣賞對方食極唔肥，吳啟洋招積直認食唔肥反而參賽後更瘦，氣得姜濤說：「我唔揀你。」
被貼成大熱的吳啟洋感到超大壓力：「佢完全地誇張咗我，佢睇到公開表演時人數唔多，仲有好多實力選手，而且今屆唱歌跳舞人都好勁，我自己好多不足地方，仲係好嫩。」吳啟洋接受姜濤意見，但亦有投訴：「佢都客觀，但主要係讚我，想佢俾多啲意見我。」姜濤竟說：「唯一值得彈地方係冇嘢值得彈。」兩人感覺似是一對深交好友，吳啟洋指大家唔太熟，姜濤界定大家為三分熟，對於即將卸任造星他並沒有不捨，反而作出忠告：「加油呀，100萬唔係咁易拎，要過關斬將。我唔會唔捨得，又唔會叫我攞番100萬出嚟。」
正如前言所指參加節目最重要獲花姐歡心，第一輯時花姐已明目張膽地表現霸道，意見最狠又最mean，新一代造星均有同感，慶幸還未有得罪花姐，Aiden說：「覺得花姐好多時聲量比較大，但出發點係善意，係好好導師，雖然好似咩都鬧，好mean，但想我哋推進。」Hugo大膽表示：「花姐係紙老虎，喺大家面前好惡好嚴厲對參賽者，但其實心裏好似紙咁柔軟，可能會覺得佢偏心某啲參賽者，其實佢想每個都好，係媽媽心腸。」吳啟洋沒有因大熱而自傲，坦言經常被花姐踩冇星味，他說：「本身花姐較少鬧我，但有同講過下次foul一定foul我，言語上成日被攻擊，除了花姐外，工作人員都會話『你呀？算吧啦！』可能想我哋習慣接受評擊。」
採訪：卓寶花
場地提供：桔梗
場地提供：桔梗
攝影：陳俊強
DV片段：葉君海、林德雄
《造星II》節目將於本月底推出，上屆冠軍姜濤睇好吳啟洋。
吳啟洋表現全面，姜濤讚他無缺點。
Hugo外觀不算俊朗，不過演技出眾。
Ian教路，就算《造星II》是比賽，都應該以團隊行先。
Aiden以演戲唱歌晉身。
Anson Lo就教大家比賽之餘，亦要照顧好花姐。
幾位師兄向師弟教路。