容祖兒及郭富城噚晚出席IFPI頒獎典禮，祖兒已經多年參加呢個頒獎禮，噚晚佢拎咗五大獎。

問到係咪拎到冇感覺？佢話：「好有感覺，呢個有感覺，真金白銀，好多時頒獎禮，有好多唔同標準及條件，你攞到個獎，要符合唔同準則；但買唱片冇準則，你鍾意畀錢買，嚟得直接﹑比較簡單易明，比如開演唱會，你有人買飛，代表你OK啦，好直接及真心支持，郭富城都嚟你就知啦。」

今年會出幾多隻碟？祖兒謂：「我會出兩隻，四月一隻EP，接住出大碟，中間有個同李克勤嘅騷，會撥多啲時間準備呢個騷。」佢又話會有合唱歌，0依家煩惱緊揀歌，佢以漁翁撒網嚟形容，祖兒話：「噚晚漏夜開會，揀來揀去唔啱心水，即開電話簿搵啲朋友，比如王菀之，落order急call，我自己好鍾意Ivana旋律，佢同軒仔嘅《手望》，係近年嚟最成功及深刻合唱歌，有機會得到佢一首歌曲，都好開心。（Ivana應承你未？）佢話睇下有冇靈感，我都畀咗Deadline佢。」

講到師妹鍾舒漫（Sherman）認回復單身，同吳浩康做番朋友，咁有冇安慰Sherman？祖兒話：「都未嘗不可吖，每一次戀愛經驗令佢學識一啲嘢，又長大一啲，咁我相信Sherman一個咁好女仔，到最後會搵到個識得愛佢及錫佢嘅人，我覺得呢啲係過程嚟嘅。」

咁會否幫佢介紹？祖兒喟：「佢個教會裡面好多弟兄姊妹，好多教友，應該望下周邊，Sherman真係一個值得人錫嘅女仔，我都唔擔心，希望佢唔好咁心急要去談戀愛，要去睇定先。佢係一個好有愛心嘅人，我覺得應該搵到個比佢更有愛心嘅人愛佢。」