冰島土地面積約10萬平方公里，是香港的100倍，但人口僅33萬，不及一個油尖旺。這並不代表冰島很荒涼，因為單是今年，估計就有230萬旅客到訪。2008年瀕臨破產的冰島，有賴旅遊業振興經濟，但人滿之患也帶來另一危機。

「睇你企喺咩角度睇啦，如果係經濟角度，係好事，冰島掙錢多，經濟好，有邊個會唔開心？但係如果由冰島本身來睇，確實因為遊客多所以為大家生活帶來唔少改變。非常簡單講，以前喺街行街唔會撞到人，但係依家如果行路唔睇路，好容易同人相撞」阿丹說。

以必到景點藍湖溫泉（Blue Lagoon）為例，「我啱啱嚟嘅時候，Blue Lagoon係藍色嘅，但係依家已經係綠色。因為多咗人，海藻嗰啲水中微生物多咗，好難即刻去清理。官方話mineral（礦物質）多咗對你好，但其實係人都睇得出係因為太多人，藍色自然變綠色。我哋依家係默默地叫Green Lagoon（綠湖）囉」。

冰島有很多私有土地，冰島法例規定，所有冰島人都可以任意進出任何私人土地，但外來旅客除外。無奈旅客卻偏要硬闖，「有個叫Tiffany Blue嘅瀑布，其實係一個私人地方，已經講咗好多次，之前個地主已經嬲㗎喇，將佢block（封）咗，但都係有啲遊客要跨過去，我都覺得唔係幾好意思。有啲遊客可能一世人嚟冰島一次，雖然你好想去嗰個地方，但都要尊重人哋㗎嘛」。

又例如南部一個石灘，因為遺留着一架美軍軍機的殘骸，又有Justin Bieber前往取景拍MV，招來大量遊客前往，結果被地主封路，嚴禁車輛駛入，旅客只能徒步一、兩小時進入。阿丹說，其實該區本身屬於offroad（不准車輛行使的地區），「冰島法例規定唔可以喺offroad揸車嘅，但可能以前啲人唔知道有咁嘅規定，同埋嗰時冇咁多人去嗰度，一、兩架車去唔會太大影響，但後來越嚟越多人去，啲車行經個沙灘會留低痕迹，冰島係一個非常注重環境保育嘅國家，最希望就係保持最原始嘅狀態」。

如同香港傳媒不時報道遊客的劣行，這裏也有不少旅客事迹被推上報：「好多人鍾意來冰島camping（露營），但其實camping有好多規則，唔係就咁見到塊綠地就可以搭營。有旅客曾經喺首都市區音樂廳Harpa前面個草地真係搭咗個營，係上個月嘅事，都幾佩服佢哋嘅創意，結果梗係俾警察趕走喇」。

冰島人最厭惡的是破壞自然的行為，有遊客試過破壞地上的苔蘚，「佢哋覺得好得意，踩落去腍腍地，但其實係好幾千年先至生到咁樣，嗰啲人就手多掹落來做紀念，呢啲行為太自私，可能你覺得掹嗰下好爽，但係之後佢係需要好長好長嘅時間先可以生番嗰一撮草出嚟」。

去過冰島旅遊的人都會記得，全國各處有不少被人疊起的小石塔，「其實有啲係冰島人用來做記號嘅，因為一落雪好多路會封晒你睇唔到，雪同路中間完全冇一個分界，佢哋好多人都係靠堆起嘅石頭來分辨，但係有啲遊客唔知，覺得好玩，就自己堆好多，搞到同原本嗰啲石頭冇分別，會令人覺得好困擾」。

記者：蔡元貴