現今市場訊息萬變，品牌要持續發展就需要與時並進。於1982創立的香港家電品牌德國寶，以銷售德國生產的電熱水器起家而為人熟知，隨着時代發展，家電品牌市場競爭愈加激烈，作為家族第二代的Karen（陳嘉賢），在06年開始加入公司負責品牌管理及制定公司市場策略，作多方面宣傳，及從代入不同客戶的角度出發做推廣，成功把德國寶帶進每戶人的家中。

現今家庭電器單單講求功能已缺少吸引力，Karen表示在今年會推出美觀及實用的新系列產品，「以前客戶對廚房用具及生活電器都唔太在意外形，主要以功能行先，不過近年客戶願意花錢，追求有品味及外形美觀嘅產品。今年我哋會新推出與施華洛世奇合作嘅The Sparkle系列，包括水晶廚櫃、破壁養生機、香檳杯、杯墊套裝等，美觀之餘又實用，自用或送禮都冇問題。」

現時擔任德國寶副總裁（市場推廣及業務發展）兼執行董事的Karen，主要負責品牌管理及制定公司市場策略，「日常最多嘅工作會係與各部門開會及視察店鋪，由產品開發、定價、宣傳、銷售渠道及物流等，我都有份參與。要做好marketing嘅工作，首先要了解每件產品，𠵱家公司每款產品我都識用，知道賣點，然後先可以制定適合嘅推廣策略。另外，我會將收集到嘅客人意見，同研究團隊交流，從而定下新嘅產品研發方向及作出改善。」

身為德國寶第二代的Karen，在美國修讀工商管理及經濟學雙學士，98年畢業後並沒有回家中工作，「咁啱出面有工作機會，想喺外面見識吓，由市場推廣助理做起，期間喺紐約讀咗個教育碩士，進修自己。」

建立市場推廣部
直至06年，德國寶有新的發展項目需要人手，Karen便回到家裏幫忙，「當時公司想喺內地建廠，需要有人負責跟成個項目，於是我返咗去幫手，不過喺08年遇到金融海嘯，項目要暫緩。之後我正式返嚟香港總部工作，當時公司仲未有市場推廣部，而我比較熟悉市場推廣及宣傳嘅工作，加上我認為市場推廣有助建立公司嘅品牌形象，就決定成立市場推廣部。」

Karen表示一個新部門的成立，對公司及自己來說，都有很多事情要去適應及學習，「要管成間公司嘅marketing唔係咁易，自己去中大兼讀咗個marketing碩士，惡補知識，當時放工趕去上堂，都幾辛苦。另外，要搞marketing，始終要配合唔同嘅部門先有效果，但同事未必知你做緊乜嘢，都要做好多內部嘅教育及推廣，令同事明白。」

重新包裝
要建立公司形象，Karen表示需要一步一步慢慢做起，「公司做開B2B生意，多數係發展商及裝修師傅用我哋嘅產品，包裝唔太考究，例如產品包裝上嘅logo可能係IT部嘅同事幫手加上去，字體及大細都唔統一，但公司想發展B2C嘅市場，建立品牌形象就要從細節做起。我哋將每件產品嘅包裝、說明書宣傳單張重新統一設計；另外，要將公司管理系統化，申請ISO及Q嘜認證等。」

隨着公司推出新產品，Karen認為設身處地為客戶着想，能得到更好的推廣效果，在她懷孕時就想到利用營養食譜推動產品的鎖量。「當時坐緊月，我要吸收多啲營養，成日係度諗點用公司嘅產品整到有營養嘅食品，好似用破壁養生機整豆漿、連骨魚湯等，仲整理成食譜，然後出版成書。出嚟嘅宣傳效果好好，帶動到個破壁養生機嘅銷量，現時成日都缺貨。」

開烹飪班sell產品
從客戶角度出發的效果不俗，Karen便朝着這個方向做推廣，「我哋開始推出親子料理、家常菜、韓劇經典菜式等一系列嘅食譜去吸引買家，仲有與我哋嘅代言人肥媽，作更全面嘅合作，搵佢出席唔同嘅活動；另外，我哋亦有開設烹飪班，教導點用德國寶嘅產品整唔同嘅菜式。喺產品開發上，我哋標榜養生、健康、多功能及預設烹飪程式等，透過唔同嘅渠道令客戶體驗到，德國寶嘅產品點樣方便到佢哋，一切都係想產品落到地入到屋。」

在公司工作至今，Karen表示挑戰每時每刻都在，而她的工作就是要令公司不斷向前，「嚟緊公司會向O2O（Online to Offline）嘅模式發展，開設offline體驗店，發展更多嘅online銷售點，及投放資源在網上推廣，例如收集大數據用嚟優化產品設計。我哋仲會喺社交網站介紹食譜，嚟緊會與法國廚師協會合作，推出高級烹飪班，希望將德國寶嘅產品推向畀更多嘅用戶。」

後記︰多功能又易用
作為不多做家務的記者來說，家電的認知還停留在冷氣、電視、雪櫃等，最新的認知可算是光波爐，但也只是聽其名不知其樣子及功能。在這次訪問中，參觀了德國寶的陳列室，可說是大開眼界，慢煮機、真空破壁機、麵條機等，強大的功能，使用起來卻十分簡單，記者不由心動想選購幾部機，減輕媽媽的工作，又可增加自己的口福，咦？看來Karen的宣傳真的成功了。

搵好工，即上 http://www.ecjobs.com.hk