陳志雲同王喜下個月22日至27日，會喺新光戲阮一齊演出舞台劇《雷雨對日出》，今日兩人一齊接受咗《蘋果》專訪，除咗講到涉貪案、兩人友誼，志雲仲講到生死。

志雲話：「可以同大家講，唔係話要入屋嗰啲，講人生，譬如講再大啲題目，死亡唔知幾時，唔止年紀大，年紀輕都會離世，隨時都要有呢個準備，啲嘢唔好搞得咁複雜，要有交帶先得，如果唔係好麻煩，年紀大反而肯講，老人家願意講，你應該同佢講。好似我爸爸媽媽，我就好清楚佢意願，變咗你冇咗心理負擔同壓力，我哋能夠正面面對死亡，就更加積極去面對你嘅人生。」

志雲大師仲借用《雷雨對日出》劇作家曹禺嘅呢句對白「戰士應該死喺戰場上面，作家應該死喺書枱上面，演員應該死喺舞台上面」，交代對生死嘅睇法：「因為一個人如果唔用盡佢嘅才智同精力而離開呢個世界，係會有啲遺憾，係浪費緊你嘅人生，正因為你面對死亡。你係知道你嘅生命係有限，先要更加珍惜，身邊有緣嘅人，好似呢啲人（望望王喜）無論係血緣，或者友情，都要珍惜。」

記者問到兩人友情昇華到更高層次？志雲：「即係點呀，你意思係友情昇華到愛情？通常係愛情昇華到友情。」王喜話：「咩呀，愛情轉淡先變做友情。」志雲答：「係咩，咁你話有冇變到呢，哈哈哈。」