總結三月，相信唔少戰友嘅心情都係有如坐過山車，月初騰訊（700）帶領科網股創新高，阿里巴巴斥62億入股文化中國（1060），復牌當日一度升四倍，如果當日有人同你講，科網股會爆煲喇，快啲走貨，相信一定引來眾人恥笑。
究竟今次係概念爆破定係另一個大震倉，真係要事後先知，但無可否認，資金已悄悄換馬，擁抱舊經濟股。
上周創新高的股份遠比創新低的少，證明市況仍然麻麻，不過學曹Sir話齋，「炒股唔炒市」，最緊要仲係捉到市場炒緊乜，過去一周唐牛已開始推介舊經濟股份，繼績佳的潤泥（1313）之後，今日要介紹另一隻強勢水泥股，安徽海螺水泥（914）。
海螺水泥上周公佈業績，純利勁升48%，單以下半年計已賺63億元，是上市以來最強勁的半年純利。

將踏入水泥業傳統旺季

受惠於城鎮化政策，淘汰落後產能，水泥價格穩步上揚，睇嚟呢個情況會在2014年持續，加上第二季係水泥行業的傳統旺季，唔排除屆時會再發盈喜。
上周更有國內報道指，安徽申請自貿區已上報國務院，如此多咗一個自貿區概念，就更有火氣了，睇埋圖表就更加買得放心，三月份累積升了兩成，大幅跑贏大市，上周五更創新高，成交急增至10億元，確認咗升穿雙底頸線，量度升幅可見38元，如果自貿區的消息有資金跟進，突破歷史高位41元絕對不是夢。

唐　牛