35歲才入行嘅女歌手，佢會紅嗎？

由幕後走到幕前嘅唱作人，你有興趣聽吓佢嘅歌嘛？

佢的名字叫周沂，係前港姐李綺虹嘅表妹、樂瞳嘅閨密，周沂宣傳處女唱片，樂瞳義不容辭陪唱K。大家可能只記得樂瞳出過性感寫真，忘記佢09年攞過「叱咤生力軍女歌手」銅獎，兩人唱完Beyond《喜歡你》再唱周沂《誤會太深》，好聽。

10年前兩人在工作場合認識，之後周沂憑《第五季》參加CASH創作大賽攞冠軍，咁啱唱片公司老闆揀咗呢首歌畀樂瞳唱，姐妹情就係咁機緣巧合。周沂笑說：「一見如故，佢冇乜fd，成日黐住我，哈哈！」樂瞳說：「記得有次去西西里，佢揸車搵酒莊食飯，但揸咗去無人之境，我喺車裏面喊，佢若無其事話出返去搵嘢食，我死死地氣話是旦，我哋感情好似男女朋友。」

笑口常開嘅周沂，原來受過抑鬱症煎熬：「前幾年家庭、愛情、事業全部排山倒海咁嚟，一時崩潰，呢個病困擾咗我3年，最失控爬上屋企騎樓想跳落街，發癲，朋友拉番我落嚟，自己都幾噩然，因為我本來係幾開朗嘅人，點解會變成咁，所以好積極面對，多謝閨密陪我，加上慢慢睇醫生，自己諗通咗，人生可以好短暫，有啲人抑鬱症自殺死，做音樂令我最開心，每日起身都好期待去錄音室，我覺得做人先有意義，淨係為生存而活好易抑鬱！」

眼看着好友沉淪，陪着度過難關嘅樂瞳說：「上到佢屋企，見佢喊喊喊，我明白嘅，因為屋企人有事，又知佢失戀，嗰時好擔心佢，唔知自己可以做乜，盡量多啲時間陪佢。」走出陰霾嘅周沂，轉做歌手壓力更大，擔心影響病發嗎？佢笑笑說：「我o依家呢個年紀，經歷過低潮，經歷過失去，想死都試過，仲有乜好驚啫，o依家出嚟所謂嘅幕前，我冇晒心理包袱，反而唔做會後悔。」35歲做歌手，唔覺得遲？周沂坦言：「遲，遲到不得了，所以對自己冇乜期望。」

李綺虹表妹身份對你有冇幫助？周沂說：「如果早多十幾年會好啲，可能快啲認識你少少，但唔會因為邊個嘅邊個特別畀面你。」原來，周沂曾經做過李綺虹嘅助手，她說：「表姐嗰時喺內地拍劇，咁啱我又放暑假，佢話你冇嘢做過嚟見識，好痛苦，哈哈，因為朝早6點拍戲，當時內地配套好差，酒店冷氣都冇，幫佢執頭執尾，跟住佢斟茶遞水，挽水袋孭背囊，幫佢讀劇本，因為佢中文唔好，仲要幫佢洗衫洗底褲，妹仔咁囉，佢冇蝦我嘅，大家親戚，但見到其他藝人嘅助手真係好慘，一千蚊一個月，表姐就畀好多錢我。」洗底褲都肯？周沂大笑：「睇錢份上，哈哈，講笑啫，你估真係一條底褲咁搓咩，純粹係成機衫都要洗，洗完都要幫佢晾，有底褲有襪。」

場地：Mega Box CEO

更多娛聞，喺晒《娛果》
http://fb.com/appledailyent