集真人同動畫嘅電影《太空也入樽》（Space Jam），相信係唔少籃球迷必看嘅電影，18年前做主角嘅米高佐敦，以及客串嘅伊榮、巴克利、波古斯等NBA球星亦全部退休；電影公司一直想開拍續集，但只聞樓梯響，不過今次睇嚟成真，「大帝」勒邦占士仲會接替MJ做主角㖭。

據美國《Deadline Hollywood》報道，電影公司華納已經開始《太空也入樽2》嘅籌備工作，由查理艾伯索爾做監製，佢兄弟威利負責劇本創作，內容會唔會好似第一集咁，以MJ打低外星怪物為主就不得而知，但就會加入唔少勒邦占士個人成長經歷，希望增加真實感同更勵志。一如上一集，除左4屆MVP勒邦占士外，仲會有大量球星客串，同大帝私交甚篤嘅獲迪、安東尼、基斯保羅等都好大機會上鏡。其實勒邦占士都唔係第一次傳聞轉行拍電影，之前已有傳佢會同影星奇雲赫特合作拍《Ballers》，唔知大帝嘅魅力，可唔可以由籃球場帶到戲院呢！