阿仙奴上輪英超慘負利物浦0:4，領隊雲格同一班球員都被外界插到體無完膚，連一向當教授係恩師嘅韋拉都出聲，講出前球會不足地方就係球員喺場上踢得過份自由，勸雲格應該學吓死對頭摩連奴，喺戰術部署方面做得更嚴密，先唔會咁容易畀對手反勝。

雖然韋拉講呢番話時，唔係就住呢場0:4大敗，但佢認為兵工廠最缺乏就係呢種韌力：「我承認，阿仙奴有時真係踢得好，我唔可以話目前呢班球員，唔夠我哋嘅年代好，因為咁講好唔公平。不過，我覺得如果想鎖定勝局，踢得好並唔足夠，而係當你贏緊嗰陣，點樣將呢個1:0嘅局面，帶到去完場，」佢繼續補充：「雲格會畀球員足夠自由度去發揮，咁樣對球員好好，但有時必須要遵從戰術嘅部署。我同摩連奴亦喺國際米蘭共事過，佢就會好專注喺啲細節上，畀好多資料出嚟，呢樣嘢好緊要......」

現時仲教緊紐約城嘅韋拉，就希望可以將兩人嘅優點結合，搵個平衡來實踐自己嘅足球哲學：「我跟過好多名帥，佢兩個都有好多優點值得我學習，仲有卡比路、文仙尼，佢兩個都好講求紀律，而文仙尼研究戰術時會用成個半鐘咁多，卡比路嘅特點就係對球員夠嚴。」