港股之前極度超買，經連續3日整固，9RSI已回近50中軸，通常RSI一下子回到甚至跌穿中軸，之後會見雙頂背馳，然後就會調整。簡單啲講，港股應該仲有一轉升吓。
投資者要捕捉下一個升浪，個別績優中資股係唔錯選擇，因為本地地產股元氣有待恢復，始終都要靠中資股托市，同時經濟數據未好轉，資金未必流去炒績差股追落後，適逢家個別績優股已完成短線調整，值博率較高。
睇番第三季業績，除咗Value Trap內銀股唔錯之外，面對行業差到爆嘅煤炭股，中國神華（1088）表現有驚喜。須知內地煤價積弱、庫存激增，第三季業績按年大跌，兗州煤業（1171）要蝕錢，但神華盈利只倒退7%，已經相當厲害。
神華以量取勝，同時一條龍做埋發電業務，佔總收入約三分之一，有晒成本效益。今年1至9月，神華煤炭銷售量上升15.1%，售電量增長9.9%，實現經營收入就升15.5%。面對行業不景，神華煤炭銷售平均價跌2.3%至每噸425.7元人民幣，自產煤單位生產成本升9.6%至每噸121.2元人民幣，令經營收益率由52.7%大幅降至46.5%。銷量升、成本升、價格跌之下，首3季純利仍升8.5%。
就當今年第四季行業繼續差，神華盈利按季冇增長，全年每股盈利約2.55元人民幣，相當於市盈率10倍，以一隻盈利防守性咁強嘅龍頭股嚟講，估值當然偏低。如果煤價反彈，或者市場對內地經濟預期好番些少，已經夠神華股價上升。