天水圍東華三院李東海小學發生女教師在校園跳樓身亡事件，有校內老師向《蘋果》控訴校長羅婉儀一直不尊重和不信任老師，經常當眾拍檯責罵老師，要求老師「諗吓適唔適合繼續喺度做」；羅更會質疑請病假的老師，甚至要求他們在病假期間工作，「聽朝要見到（文件）喺我檯頭。」

在該校任教的周老師（化名）向《蘋果》表示，校長經常在教職員全體會議提出問題，然後要求個別老師站起來解釋，但老師說不到兩句便會被校長拍檯打斷，直接指出其問題和責罵。周記得，校長罵某同事曾說：「你咁高人工，你嘢又做唔到！我好容易就搵到人，你諗吓你適唔適合繼續喺度做！」在罵另一同事時又曾說：「你時間觀念都唔好，你又冇計劃，咁你點做一個老師呢？你點樣可以教好學生？你可能考慮一吓教育呢個行業適唔適合你做！」

周老師憶述，校長曾說自己「好鍾意做嘢」，若老師不懂分配時間，便要「另覓高就」。周認為，若有心解決問題，應個別跟老師傾談，不應在全體會議上公開指責。

周老師又稱，有時老師因病請假，也會在會議中遭受批評，校長更曾說：「我呢就唔會畀自己病！作為一個老師，你要照顧好自己健康！」即使老師請了病假，也會收到校長的短訊，要求老師翌日將文件放在她桌面上。

去年9月山竹襲港，周老師稱校長曾在十號風球下向全體老師發電郵，要求老師翌日準時上班處理事務，強調「學生停課都唔代表老師要停工」。周說，學校位處在天水圍，不少同事要長途跋涉上班，卻發現道路封閉無法通行，但在路上才收到校方電郵，指若情況不許可便不用回校，但主任級的老師必須回校工作。

記者 鄧力行

全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2VKESPM