食環署今年4月兩日內檢控大埔墟街市8個攤檔，形容為豐碩成果。記者早前到該街市了解情況，有商販表示，食環署人員每日至少巡查一次，有時會拍照紀錄，若有違規如阻塞通道等，通常先口頭警告，但突擊巡查則「冇情講」。有商販收檔時，暫移貨物出通道，即場被檢控，「覺得唔係咁公平」。

菜販敏姐表示，早前提早於下午5時多收檔，因檔位空間細，故暫時移出一箱貨物於通道上，便被食環署人員檢控，「我問因為收檔可唔可以避免，佢哋話唔得，已經影咗相」。她表示，平時都守規矩，也理解署方人員執法所需，但認為執法不外乎人情，「有時諗番都會覺得唔公平，因為嗰次我真係收檔，但都冇情面講」。

大埔墟街市現有約270個攤檔，雖有個別商販把貨物移出通道，但情況未算嚴重。「如果大家依法，就唔會話嚴」，菜販羅女士認為，署方執法合理，「你唔管個個都擺出嚟，你擺出半呎，我擺出一呎，地下有幾闊吖？」有魚檔商販指，因檔位的高台設計不合適，「啲客揀唔到魚」，近年才容許將貨物放出約一呎的「坑渠位」。

該商販坦言，署方執法時鬆時緊，「睇吓邊個新官上場，如果佢嚴起上嚟，可能日後都冇得擺，而家都係大家讓一步」。他指今年經濟不好，生意減少兩、三成，「都冇人行，希望鬆手啲，唔使執得咁嚴」。

食物及衞生局提交立法會數字顯示，去年涉及公眾街市檔戶的檢控個案有2,065宗，當中1,911宗被定罪，較2012年分別增加758宗及624宗，均創近5年新高；罰款金額也翻倍，由約51.1萬元增至逾109萬元。

立法會議員朱凱廸認為，單靠票控管理成效存疑，促政府盡快再展開公營街市檢討，包括租金及規劃等，不能再拖，「好多時街市管理問題，因為制度長期僵化、租金差異大等，快啲進行檢討，好過用票控就以為搞得掂」。

記者 王家文