名人一舉一動，好受市民關注，唔少會跟風，人買乜佢買乜。呢種行為除咗化妝品、靚衫，連百萬住宅都一樣。
講到名人買樓，第一時間諗起，睇怕都係好高調咁四處睇樓、美容界名堂響噹噹嘅蒙妮妲集團主席鄭明明嘞。不論豪宅到中小型，都見佢芳蹤，唔似有啲人好低調唔畀人知。過去半年，就入市五個新盤，大多係豪宅㖭，動用兩億一。
佢重好主動，向傳媒提供入貨資料㖭。睇佢個勢，好似意猶未盡。乜原來搞美容，可以咁好搵！
雖然佢話，有啲係幫親朋好友買，但咁豪氣，又豈是一般用家可以做得到呢？
不過，蘭西覺得，最應該感謝嘅，應該係發展商，因為有名人效應，個盤都好賣啲。
除咗明明姐，近年少喺電視報章見到嘅前女藝人蔣麗萍，早排花咗成兩千萬，買咗八個鴨脷洲深灣軒單位。不過，聞說佢今趟原來係同埋家姐細妹夾份，但就由佢出面。

羅家寶掃貨
資深投資者羅家寶，近排密密出手。
日前先以近四千萬，購入旺角亞皆老街舖位，又以一億，掃尖沙嘴明輝中心兩層寫字樓，噚日再用五千七百幾萬，買金鐘遠東金融中心四十三樓○三至○九室。
加加埋埋，短短一個禮拜，用咗近兩億。
至於今次買入嘅遠金單位，約八千四百呎，每呎近六千八，呎價重創新高㖭。部份樓面連租約。