由胡杏兒及郭羨妮（Sonija）主演，以已故樂壇天后梅艷芳為題材的電影《朝花夕拾·芳華絕代》於本月上映，二人日前於尖沙嘴接受訪問。同是已為人母的杏兒與Sonija，見面時也會講湊仔經，杏兒表示考慮減產照顧小朋友：「人生除咗工作，還要有家庭去平衡。」郭羨妮的女兒7歲大，她表示曾嘗試全職湊女，但感覺迷失，Sonija說：「o依家收工返屋企，反而特別掛住佢，會付出多啲愛，以前24小時湊就冇呢種感覺。」而杏兒表示唔會選擇做全職媽咪：「會繼續再生，亦會繼續工作，好似袁詠儀咁大肚都可以拍戲。」

Sonija在戲中飾演梅艷芳的忠實fans，她表示最難忘係喺垃圾堆中尋回梅姐嘅遺物，當中大部份是fans送給梅姐的信件，而拍攝地點正是當年的原址，Sonija說：「拍攝時要爬上密斗，但自己不小心膝蓋撞向密斗，膝蓋又痛又腫到好似雞蛋咁，返到屋企乖女見到，佢幫我搽藥膏，即刻甜晒。」杏兒話非常羨慕，希望囝囝大個都會照顧媽咪。胡杏兒飾演梅姐識於微時嘅好朋友，杏兒表示需要由18歲演到40多歲及生了小孩，杏兒說：「每場戲都交代與梅姐之間發生嘅事，所以好難忘。從fans口中知道，梅姐對fans嘅關心、對人嘅愛，更加令人感動。」

戲中故事皆屬梅姐同fans之間嘅真人真事，Sonija話：「會了解到梅姐對fans嘅關心、珍惜同感情，好似fans送俾梅姐嘅信同物件，梅姐全部都收藏喺間房，搬屋都唔會棄掉。」郭羡妮從fans口中得知，當年梅姐病得好嚴重時仍去日本拍廣告，返嚟嘅時候fans都去接機，體弱嘅梅姐仍然好關心fans，Sonija話：「梅姐一眼就睇到該fans唔開心，多番慰問，係個fans同我講番。」郭羡妮笑言：「以前覺得fans攞住燈牌嚟支持好開心，但已經過咗該段時間，o依家有活動都叫fans唔好請假嚟，一切在心中。」杏兒話：「好多fans喺讀書時候已認識，o依家出嚟工作到結婚成為媽咪，明白佢哋都好忙，唔會要佢哋嚟支持，有啲成為朋友更會約出嚟食飯。」

場地提供：La Taverna Ristorante Italiano

胡杏兒
化粧：Miko Wong (Cyrus Lee’s Team)
髮型：Angus Leung @ Hip hair culture