行山發燒友一年一度盛事毅行者11月20號起步，大會噚日為參加者舉行賽事簡介會，八方去到現場，見到個稀客，由於佢係疑似特異功能人士，佢參加比賽，對於其他參賽者咪好鬼唔公平？
呢個人就係城市電訊主席王維基，佢有「電訊魔童」之稱，又名「殺價超人」，唔少人聽到佢個名都驚一驚，佢參加毅行者，隨時一起步就拋離其他隊伍，快放到尾啦，其他人可以收工。可能舊年亞視「12日CEO」事件陰霾仍在，王維基噚日竟然收起平日牙擦寸爆本色，反而好謙虛咁話，報名時以為48小時內行100公里麥理浩徑全程好容易，聽完簡報會先識驚，擔心行唔晒㖭。

冇信心限時內行完

八方記得王維基有名句「最憎靠人」，向來自信心爆棚，今次卻未出發先腳軟，唔似魔童講嘅說話喎，佢以打倒巨人為榮，去年加入亞視後，揚言唔做「中央十台」，聲稱「即使有北面支持，我都唔要。」為乜今次咁騰雞？
魔童話佢同副局長邱誠武好熟，知道對方五年前都可達標行畢全程，自己無理由唔得，所以膽粗粗報名，噚日先知道原來每年只有一半多啲隊伍可以達標，雖然佢近年有跑馬拉松，但係首次同下屬組隊出征毅行者，經驗上冇優勢，體能亦不見得有着數，所以冇乜信心在限時內行畢全程。
話雖如此，魔童備戰卻無鬆懈，除非不在香港，否則每日都跑10公里，又開始到麥徑練習，希望行多幾步盡力爭取好成績。作賽時間無望創出佳績，退而求其次，魔童話目標係打破籌款紀錄，目標係籌到逾50萬元，佢話已全方位向各界朋友募捐，總之搵到幾多得幾多。
挑戰完毅行者，魔童明年2月會出發去南極，當然唔係睇企鵝咁普通，佢贊助一隊攝製隊到南極拍攝有關氣候暖化問題紀錄片，屆時會隨行出發，親眼睇吓氣候變化對大自然嘅影響，勞師動眾去拍片，梗係唔好嘥，2012年就會出街，咁咪即係好似志雲大師喺《冰天動地》出鏡咁，下次會唔會開個「魔童飯局」呢？
mailto:[email protected]