當年今日
關於我們

【收市閒情】李嘉誠,帶著「小小超」返潮州(千頌C)

蘋果日報 2017/06/27 21:17

李嘉誠李澤楷李澤鉅小小超

李嘉誠今日去汕大出席畢業禮,新聞稿發相,見到超人帶住小小超李澤楷,四圍行逛,呢頭介紹吓名勝,嗰頭一齊吹吓水。你看見了樂也融融,我卻看見了超人的啟示。
大家都知,以李澤鉅嘅作風,真係同你計到盡,賺錢,佢就叻!所以超人將長和系交棒畀小超,超人會講,「Victor會頂替我(長和系)的位置,我好放心。」好啦,講到教育,除非你係硬銷補習名師嘅學店,否則根本唔係一門賺錢生意;如果想做好教育,好多時更加要蝕錢蝕入肉。講到「肯使錢」呢方面,好明顯啦,小小超李澤楷(超人腔)「一定冇問題」。睇得出嘅,超人係重視教育嘅,所以相信汕大校董會名譽主席呢個位,應該好快會落入小小超手上。
大家可以唔鍾意李嘉誠,但講到用人以至做生意,佢眼光從來獨到。單講十年前,喺你同我仲討論緊「你係咪同台先?同台先可以免費Send SMS」時,佢已經投資Facebook,之後當然金蛋隻隻出、Spotify、Airbnb、甚至係DeepMind……。
Deepmind?咩來架?食得架?唔好笑,應該好多人唔知。呢兩日聽到有人講,話有內地客落香港旅行,去食嘢冇Cash,於是伙計即時就話,「你仲唔係食霸王餐」。冇錯,當你笑人冇Cash開飯,人哋笑你食飯用Cash,「親親!咱們內地現在都不用現金!」
香港回歸二十年來,世界不停向前,香港就一直食老本。八達通,岩岩好面世20年,當時一卡震驚世界,結果咩呀?一Doo就Doo足廿年。順住潮流去啦,Uber出現,結果咩呀?「創新及科技局」話,「你犯法!同我走!」
超人喺汕大演辭入面講,「因循的併發症是不思不想和無感無知,在人工智能世代中肯定過不了關。」因循、守舊,正正係香港依家最大鑊嘅問題,但問題係,你對住一班仲用緊Internat Explorer上網嘅人,你如何同佢講咩係咩係人工智能?
20年來,唯一肯定有賺無蝕嘅,就只係樓市(當然,呢方面李嘉誠係贏家中的贏家)。過去曾寫過,香港人唔敢創業,因為創業個機會成本高,至少你短期內一定買唔到樓。不過,世界變啦,依家點都買唔到樓啦,創業,仲會係機會成本咩?
「我明年90歲啦,一生志在千里,也知似水流年」,見到演辭入面呢句「似水流年」,第一時間諗嘅,多數唔係《牡丹亭》,而係會唱出嚟,仲唱埋下一句「不可以留住昨天」。
by千頌[email protected]堆填區
http://fb.com/winbigwok